Roedd 2025 yn flwyddyn brysur arall o ail-ddychmygu opera i Music Theatre Wales. Fel erioed, ein nod oedd cwestiynu beth all opera fod, a phwy sy’n ei chreu — drwy ffyrdd newydd, beiddgar a chreadigol o greu, profi a meddwl am opera.

Bu’r gwaith yn digwydd yn fyw, ar-lein, mewn ysgolion ac mewn cymunedau, ar draws Cymru a Lloegr. O ganlyniad, fe gyrhaeddodd MTW dros 6,100 o bobl. Isod ceir cipolwg, drwy’r niferoedd, ar yr effaith a gawsom yn 2025.

Ein cyrhaeddiad yn 2025

• 1,700+ o blant a phobl ifanc
  Drwy waith gyda ysgolion, Cyfeiriadau’r Dyfodol a’n rhaglen gyfansoddi Nodau Newydd

• 2,600+ o bobl wyneb yn wyneb
  Mewn perfformiadau, cyflwyniadau, trafodaethau a digwyddiadau mewn theatrau a lleoliadau cymunedol

• 3,500+ o wylwyr ar-lein
  Yn ymgysylltu â’n hoperâu digidol a’n cynnwys ar-lein

Nod Music Theatre Wales (MTW) yw rhoi bywyd newydd i opera, gan ei chyflwyno fel ffordd o adrodd straeon drwy gerddoriaeth sy’n cysylltu â’r byd o’n cwmpas. Maent yn gweithio gydag artistiaid sy’n dod â straeon newydd i opera, gan danio grym a brwdfrydedd y ffurf ar gyfer cynulleidfa ehangach.

Mae’r grant hwn yn un o 11 o wobrau sy’n cael eu darparu drwy Gronfa Pen-blwydd 30 Mlynedd Ymddiriedolaeth Elusennol Colwinston. Caiff y grant ei roi i MTW i gefnogi datblygu a chynhyrchu dau brosiect cwbl newydd ar y cyd â Britten Pears Arts a Glyndebourne yn 2027.

Bydd manylion pellach am y ddau brosiect newydd hyn yn cael eu cyhoeddi’r flwyddyn nesaf.

Lansiwyd y Gronfa Arbennig i nodi pen-blwydd y Sefydliad yn 30 oed ac i ddathlu arloesedd, rhagoriaeth, mynegiant creadigol a chrefft adrodd straeon – boed hynny drwy gerddoriaeth, opera, perfformio, celf weledol, arddangosfeydd neu’r gair ysgrifenedig.

Gwahoddwyd ceisiadau gan sefydliadau celfyddydol i gyflwyno prosiectau uchelgeisiol, arloesol ac amlwg i helpu pobl i werthfawrogi’r posibiliadau diddiwedd y gall y celfyddydau eu cynnig.

Dywedodd Michael McCarthy, Cyfarwyddwr Artistig Music Theatre Wales:

“Rydym wrth ein boddau ein bod wedi llwyddo yn ein cais i Ymddiriedolaeth Elusennol Colwinston i gael y gefnogaeth hon, a fydd yn ein galluogi i barhau i greu profiadau opera eithriadol i gynulleidfaoedd yn y dyfodol. Hoffem ddiolch yn fawr iawn i dîm Colwinston. Mae’n hynod o galonogol cael cefnogaeth o’r fath yn y cyfnod heriol hwn wrth i ni edrych tua dyfodol y ffurf gelfyddydol rydym yn ei charu. Rydym yn gyffrous iawn i ddechrau’r cydweithrediad gyda Britten Pears Arts a Glyndebourne ac edrychwn ymlaen at fynd ati i wireddu’r cynlluniau.”

Dywedodd Mathew Prichard CBE, Sylfaenydd a Chadeirydd Ymddiriedolaeth Elusennol Colwinston:

“Mae Ymddiriedolaeth Colwinston yn falch iawn o ddathlu 30 mlynedd o weithio gyda llawer o sefydliadau celfyddydol safonol ar draws y DU drwy ddyfarnu Grant Pen-blwydd arbennig i gefnogi cydweithrediad strategol newydd a datblygiad opera newydd gan Music Theatre Wales ar y cyd â Britten Pears Arts a Glyndebourne.”

“I ddathlu pen-blwydd y Sefydliad yn 30 oed ac i nodi mwy na 30,000 o berfformiadau The Mousetrap ers ei hagoriad ar 8 Mehefin 1952, roeddem eisiau dathlu mynegiant creadigol a’r grefft o adrodd straeon – drwy gerddoriaeth, opera, perfformio, celf weledol, arddangosfeydd neu’r gair ysgrifenedig. Lansiodd yr Ymddiriedolaeth y gronfa arbennig hon o £1,000,000 i ddathlu arloesedd a rhagoriaeth yn y Celfyddydau, ac i gefnogi prosiectau sydd wedi’u cynllunio i gynnig effaith a mwynhad eithaf i gynulleidfaoedd.”

“Treuliodd fy Mam-gu ei hoes yn cael ei swyno gan y Celfyddydau. Ysgrifennai i ddiddanu ac roedd wrth ei bodd yn cael ei diddanu gan gymaint o ffurfiau celf wahanol. Rwyf yn parhau’n ddiolchgar i’r holl ymarferwyr Celfyddydau sy’n parhau i ddod â’i gwaith yn fyw ac sydd wedi galluogi Ymddiriedolaeth Colwinston i fod yn rhan o brosiectau y credaf fyddai wedi bod yn agos at ei chalon. Fy uchelgais yw y bydd y gronfa pen-blwydd yn parhau i annog hyn i ddigwydd.”